Interview mit Annemarie Ha.

So sieht der Hof heute aus:




Wie heißt du ? Ha. Anna....
Annamaria oder Annemarie, des isch egal.
Gebore bisch du...
1944 bin i gebore, in Schmiedberg am Wald, hot s domols no ghoiße, iatz hoißts Buchen, bei Walzlings.
Gell, also it des Schmiedberg im Reintal, sondern...
..des beim Hiltenspergar dob.
..am Waldrand do doba
..ja, ganz am Wald.
Do bisch gebore ond aufgwachse, oder ?
Ja, des war frei sche. Aber heit mecht i numma do dob sei, do hett i glaub Angst irgendwie. Domols hot ma nix denkt.
Zu einsam ?
Noi, it zu einsam, aber vo der ganze Welt her irgenwie, so näh am Wald det ond z Obend so alloinig, so denk i halt.
Des isch iatz allat no a Hof, oder ?
Ja klar, dean hot mei Bruder, der jüngste.
Hand deine Eltre dean Hof baut oder kauft ?
Dean hand die vo Großmutter ond Großvater übernomme, die waret detmols au do dob. Großvater ond Großmutter waret do, Mama ond Papa waret do ond mir Kind waret do.
Also die dritt Generation, die scho dean Hof hot. Wie s dervor war, woisch numma ?
Na, do muss a Urgroßvater no do gwea sei, dean ha i auf am Bild gseah, aber dean ha i numma kennt. Der muss so an Bart ghet hau, der muss wild ausgseah hau.
Manchmol hand im Allgäu ja Baure an Hof kauft, später wieder verkauft ond hand dann an größere Hof meh kauft. Des isch bei ui iatz itta so der Fall gweah ?
Na, na, des war bei eis it so. Mir hand allat dean Hof bewirtschaftet. Dr Bruder macht iatz weiter.
Ja, wie groß war der Hof detmols, wo du auf d Welt komme bisch ?
Ja frog mi it, aber so fuchzeh Kieh hand se khet, aber Hektar ond so ka i numma sage.
Des war viel oder ?
Ja, scho.
I woiß no, eiser Nachbaur hot so siebe Kieh ghet. Also fuchzeh isch scho a gutar Hof gweah, so. Do ka ma nix sage. S wievielte Kind bisch du dann gweah von dene Neun ?
Do muss i zescht zähle: s fünfte. Mir waret sechs Mädla ond drei Bube. Also mit mir sechs Mädla.
Die hand alle schaffe müsse aufm Hof ?
Ja, iatz muss i mol so sage. Die Größte, die isch scho zum Schaffe gange. Die isch 1935 gebore. Ond dann meine zwei Brüder, wo die noch so groß waret, sind die zu schaffe gange. Die hand Lastwagefahrer gmacht beim Burger, wenn dean no woischt. Do hand die gschaffet. Nochar war mei andre Schwester, die blos a Johr älter isch. Mir waret Drhoim, mir zwei.
Ond die älteste Schwester, wo hot die gschaffet ?
Die isch als Bedienung gange in Wertach.
Des isch ja au weit weg, hot die dann auswärts gwohnt ?
Ja, ja, die hot in der Wirtschaft det gwohnt praktisch.
Ond d Eltre, die hand blos d Landwirtschaft ghet ?
Ja, die hand ja au gar it meh schaffe könne, wenn do so viel Kinder omanandspringet. Do hot ma Arbat gnue khet. Mei, die hand ja praktisch vo dem Hof gleabt, wenns so saisch, wenn so denksch, gell.
Ja, des isch ja au gut gange, domols.
Ja.
Wie war der Hof ausgstattet ? Hand ihr an Bulldog khet?
Erst viel später. Zerst hammer blos an Gaul khet, halt ein Pferd. Ond dann hot ma an Motormäher kriegt, den kennsch ja ond später hammer dann an Traktor ghet.
Wann hand ihr den kriegt, den Traktor?
Den Traktor ? Wo i 16 war, i ha dann de Führerschein für den Traktor mache müsse, damit i fahre ha kenne.Do wo i praktisch zum Schaffe gange bin.
Ond die Nachbaure, hand die scho vorher an Traktor ghet ?
Dr Hiltensperger, der hot glaub scho vor oin ghet. Der war scho a bitzle größer, woischt ond der isch au in Wald gange, Hiltenspergars Tone ond de Alte.
Ond dir hand solang mit oim Gaul futgmacht? Halt blos an Gaul, koine Ochse oder so was ?
Blos an Gaul.
Ond der Gaul hot alles gmacht?
Ja.
Der hot praktisch die Heuwäge zoge..
Ja, ond de Acker, mir hand ja Kartoffla ghet, mir hand Korn ghet, wir hand Rüba ghet.
Des isch alls do doba gwachse?
Des isch alls do doba gwachse. Des isch gut gweah. Doch, mir had allat no Kartoffelkäfar klaube müsse, jo ond a Korn hammer ghet, des hot ma no drescht Drhoi, mit so ar alte Blähmühle, woisch ja. A Dreschmaschine ond a Blähmühle. Kennsch it, gell? Zescht hot ma halt s Korn drosche ond dann hot ma s dur Blähmaschine dau, woisch, daß der Staub rausgoht.
Daß die Kean halt übrigbleibet. Hot ma die dann als Futter hergnomme oder hot ma die mahle lau ?
Des hot ma mahle lau. Des Mehl hot ma dann kriegt.
Wo hot ma des mahle lau?
Du frog mi it. Woisch, do waret mir no it so groß, i ha des it so mitkriegt, wo des de Papa naduet.
Ach so, do bisch du it mitgfahre.
Na, do hot ma mi it braucht. Mi hot ma zum schaffe braucht, melke..
Selle Sacha halt. Was hosch dann alls gmacht aufm Hof ?
Alles ha i dau. Gmolke, Haushalt, Garte, auf m Feld drausse, also alles.
Ja, dur des, daß dir Korn ond Kartoffla ghet hand, hot ma meh schaffe müsse, do wirds mit Gräsmähe alloinigs it getan gweah sei, oder ? Wie hand dir so gheuet ?
S Gräs hot dr Papa gmäht mit dr Mähmaschie mitm Pferd, dann hot ma s halt vo Hand gstreut oder Hoinze gmacht. Hoinze hot ma scho au gmacht.
Wie hot ma s dann eigführt ?
Mit m Gaul ond mitm Wage. Aufbiete ha i au miesse.
Im Heustock dann..
Ja, au, zescht Duss aufbiete ond dann m Heustock nauf.
A Schinderei, des heißt, dir hand praktisch de ganze Tag zum do khet
Kasch wohl sage, ja.
Wenn hosch do dann aufstau miesse ?
Wenn bi i aufgstande ? M Fünfe.
Was macht ma dann do zescht?
Zescht in Stall gau, dann gosch Num ond machsch Frühstück ond dann macht oinar de Haushalt. Mir sind ja zwoi Schwestra gweah, die oi hot de Haushalt mache müsse ond die oi hot glei mit naus müsse, aufs Feld.
Isch ma do glei in der Frieh los ? Oder bisch du im Haushalt bliebe ?
Moischtens bi i naus, mir hand halt abgweachslet, es isch ja egal, wer grad Lust ghet hot, oder d Mama hot gsait du musch des do, du musch des do.
Do hot ma de ganz Vormittag gschaffet, oder ?
Ja, dann hot ma geasse, ond dann hot ma, woisch, vielleicht wieder a Heu ghet, wo trocke war, des hot ma dann eigführt. No hosch Arbat ghet bis Zobend. Ond dann bisch wieder in Stall gange. In Stall oder die ander in Garte, wie s grad so gange isch, des hot d Mama ja au ghet.
Wenn isch im Stall dann Zobend s Melke gweah ?
Wenn ma grad Zeit ghet hot mitm Heue, mol frieher, mol später, des isch domols it so gnau gange. Woisch du hosch domols dann Milch no futdo müsse, ja, auf Walzlings na.
War do a Sennerei ?
Ja.
Do wo iatz dr Käss dinnawohnt, gell ?
Do war d Käskuche dinn, do hot ma d Milch nadau, ond do hot ma käset. Ja, mitm Gaul hot ma die nabdau, Sommer wie Winter.
Des hosch du au gmacht ?
Na, des ha i it gmacht, des hot d Papa gmacht, i ha Angst ghet vor m Gaul, woisch. Vor deam hot s mer blanget, drum ha i immer Angst ghet, wenn i in Schopf num bi. Immer, wenn i vorbei bi, hot der de Grind rausdau. Na, mit m Gaul ha s i it ghet. Der hot eigentlich blos de Papa mege.
Hand ihr den dann bhalte, weil de Bulldog dann komme isch ?
Na, dean hot ma dann wegdau. In de Stall hot ma dann Kieh numdau.
Was war denn des für a Bulldog ?
An Eicher, des woiß i, a Eicher war des mei Liebar.
So 16 PS oder so ? Mit oim Zylinder halt ?
Ja.
Mei Opa hot vom Binzgar z Altusried oin khet, des war ja oinar vo de Eschte Bulldog überhaupt. Vo deam hot mei Opa an Bulldog kauft, detmols, des woiß i no, des hoißt, des hot ma verzehlt, i seal woiß des numma.
A Eicher wars, des woiß i no, den hot ma nämlich domols dond beim Rotter kauft.
Wie war des denn, du hosch Drhoi gschaffet, aber in d Schul hosch au müsse, gell ?
Ja klar, s Walzlings. Vo der erste Klass bis achte Klass bi i s Walzlings gange.
Wieviel Klassa sind s do gweah ?
Ja acht.
Woisch, i moi, oi Klassezimmer, wo dann alle dinna waret ?
Ja, wo alle Schülar beinand waret.
No hot dr Lehrar an Unterricht für alle Schülar gleichzeitig gmacht ?
Ja, der hot eis halt was geabe, zum Beispiel Rechnunga ond dann isch ar me zum nächste. Mit oim vo eis hot ar halt was dau. Die andre hand halt für sich selber leane müsse.
Des isch gut gange, oder ?
Des isch gut gange, mei. Mir sind halt allat vo Schmidberg ra in d Schul gloffe, im Winter simmer mit de Schi gfahre, in Schnee neigfloge, des war amol ganz interessant, gell.
Ond wie lang hot d Schul dauret, detmols ?
Ja, vom Achte bis um Zwölfe, ond vo Zwoi bis m Viere.
Au no ?
Ja, mir sind am Namittag au no in d Schul gange.
Do sind dir praktisch in dr Frieh aufgstande, in Stall gange, Frühstück richte ?
Na, in de untre Klassa ha i no it in Stall müsse.
Ab wenn hosch dann do gau müsse ?
Eigentlich, wie soll i sage, wenn i no aus dr Schul rauskomme bi. Auf alle Fäll, wo i dann in d Berufschul gange bi, ha i allat am Morge in de Stall müsse, bevor i auf Altusried numgradlet bi. Ja, mir sind ja in d Berufschul gange, in die Hochschul in Altusried. Landwirtschaftliche Berufsschule, woisch. Noch dr Dings halt, do hosch dann drei Johr do in d Schul gau müsse, des isch wie a Berufschul, woisch.
Ach so, was hosch dann do für an Abschluss ghet ?
Des isch halt a landwirtschaftlichar....a landwirtschaftliche Berufschule isch des halt gweah oder hauswirtschaftlich isch es bei eis meh gweah. Bei Bube hot des eigentlich meh Landwirtschaft gheisse. Ins Haus der Bäuerin simmer do gange.
Ja, des isch bekannt gweah. Do bin i au no gange. Domols hot ma no oi Klass im Haus der Bäuerin ghet. Dritte oder vierte Klass isch des gweah.
Ja, no ha i zescht in Stall müsse, bis Zeit war, no hot mi d Mama numgschickt, no ha i mi richte kenne ond do num radle.
Auf Altusried?
Ja, auf Altusried.
Wele Strecke bisch do gradlet ?
Hm, wie soll i dir des sage ? Obarum bei Hehle, woischt, do ra bi i do gradlet. Über Bodewalz, was kut n do onda nochar..
Heckeslmühle, gell..
Heckeslmühle, ja, nochar nauf ond Altusried ra, do isch ma dann beim Bad rakomme.Ja.
Do bisch jeden Tag gradlet oder ?
Na, na, oi oder zwoimol in der Woche hot ma do ghet.
Ach so, ja, ja, des isch no besser.Ond suscht hosch halt Drhoim gschaffet.
Ja,gell...
Ja, was hammer denn no ghet ? Oi Frog no: was hot s denn do zum Easse gebe bei ui ? Woisch, wie hot denn do so a Frühstück ausgseah ?
Eiser Frühstück wie des ausgseah hot, des hot d Mutter gmacht. Die hot Bratkartoffla gmacht, mit, mit, wie heißt die bled Wuscht...herrschaft, Blutwurscht, ja, die hot ma do neischnitte, no hand d Leit praktisch scho geasse ghet. No an Kaffee derzue, ond halt a Brot derzue, ond was halt frieher gebe hot.
Also koine Semmel mit Marmelade ond Honig ond so a Zuig?
Halt a Brot vo am Laib, wo d Mama seal backe hot, ja, die hot selber backe. Mei, was hot s Mittags geabe ? Fleisch hot s it viel geabe, Mehlspeise halt, Griesmus, Holdermus, selbergmachte Nudla, Stopfar, so Sacha.
Mehlspeise vor allem. Floisch also selten.
A ja, wo ma halt gmetzget ghet hot, dann hot d Mama aber viel eigmacht, daß ma im Sommer was zum Easse ghet hot. Gell, des hot se in Gläser dau, weil ma do ja it viel Zeit ghet hot, weil ma ja aufm Feld war.
Was hot se do eigmacht ?
Fleisch, a saurs Fleisch, in Gläser.
Wie macht ma des ei ?
Des hot ma, des isch scho klar, daß du des it kennsch, des kocht ma vor, des war halt wie an Brote. Dann tut ma s in die Gläser nei..
In Eimachgläser ?
In Eimachgläser nei, ond do kut die Soß derzue ond dann tut ma Zumache ond eiwecke, eiwecke wie wenn du s Obst oder sowas eimachsch.
Prakisch au luftdicht.
Ja, ond des hebt ond im Sommer hot ma des schnell hole kenne. Warm mache oder kalt easse.
Do lue her. Wie lang hot des no ghebt, a Johr oder so ?
Na, des hot doch it so lang ghebt, du musch ja denke, so viel Leit, des hebt it so lang.
Do kut s bald weg.
Klar, so hot ma des frieher gmacht.
Suscht hot ma au was eigmacht, Zwetschga ond so ?
Ja, Birna, Äpfel, alles.
Hand dir Obstbäum ghet ? So ums Haus rum, Äpfel, Birna, Zwetschga ?
Ja, Holder.
Was hot ma denn suscht gmacht, so Vorratshaltung, haltbar mache. Hand ihr au seal a Kraut, a Sauerkraut gmacht ?
Des hot ma immer eigstampft, ja, des isch wohr.
Eier hot ma vo de Henne wahrscheinlich ghet oder ?
Des hot ma au oi eiglegt. Des isch a bestimmte Masse gweah, wo du die Eier hosch eilege kenne. Des woiß i aber au it, was des isch. Die sind nochar lang frisch bliebe. So wie so Gelee hot des ausgseah, wo die Eier dinn gweah sind. An Moscht hot ma gmacht.
Brennerei aber it, oder ?
Na, blos Moscht, was hot se denn no gmacht ? An Sprudel hot se gmacht, an Pfefferminzsprudel. Du kennsch doch die Pfefferminzstauda eventuell, woisch, wo im Freie wachset, ja, do hot d Mama an Sprudel gmacht, agsetzt.
Ja gut. Einkaufe hot ma it so viel müsse oder ?
Mehl hot se kauft, des hot s braucht halt nochar no derzue.
Milch, Eier, Kartoffla hot ma seal ghet...
Rüba hot ma au ghet, für d Kieh, Futterrieba, für d Kieh, die hot ma gschnitzlet, wenn d des no woisch. Do hot ma au so a komische Maschie khet, wie soll i sage, wie a Brotschneidmaschie, halt größer, do hosch halt die naghebt ond hosch durdreht, do hot s lauter Scheiba geabe, die hand d Kieh no kriegt.
Ja lustig. Hand nochar alle Nachbaure au Rüba abaut ?
Na, eigentlich waret des blos mir do doba.
Wie isch des komme, daß dir do doba Rüba ond Korn abauet ond die andre it ?
Frog mit it. Des war m Papa sei Ding halt, hauptsächle.
Hot ar des gleanet oder hot ar des eher als Hobby ghet ?
Des hot ma scho immer ghet, scho vom Großvater. So denk i halt.
Dann hand ihr au die Gerätschafta derzu ghet, dann ka ma des scho mache.
Mei, do brauchsch ja it viel, blos a Egge ond an Pflug. So isch die Landwirtschaft frieher scho interessant gweah, wie wenn ma huitzedag blos auf de Traktor naufhocket ond oifach fehsch ond basta.
Ja, iatz isch es me so industriemäßig. Domols war des no meh Handarabat.
Ja, ma hot halt körperlich me gschaffet.
Wenns itz z Mittag a Mehlspeis geabe hot, was hot ma dann z Obend geasse ?
Es hot a Brotzeit gea halt, Floisch ond Wurst, Käs, Milch, Kartoffla vielleicht.
Was hot ma so drunke ?
Milch, Most hot ma drunke, dean Sprudel, wo ma seal gmacht hot ond iamol isch jemand komme, der hot so a Art Sirup brocht, dean ma ins Wasser neido hot kenne. Do isch immer a Frau komme, wo do omanand gfahre isch.
So a Hausiererin ?
Wo isch iatz die hergweah ? In dr Nähe vo Wiggesbach isch die gweah. A, de Gar, kennsch de Gar ? Die erste Wirtschaft, wenn nauffehsch, rechts det müsst die sei. I woiß it, ob s die heit no geit. Ond die Frau isch allat mit so am Zuig gfahre, die isch au mit Gurka komme.
Ond Bier oder Wein, hot ma des au trunke ?
D Papa hot vielleicht a Bier ghet, aber woisch, des woiß i mumma, als Kind. Der hot aber it viel trunke.
Hot ma suscht mol zwischedur was geasse so unterm Tag, also ausserhalb de Hauptmahlzeita ?
Du woisch, wenn mir im Feld duss sind, do hosch halt was zum Trinke ghet. Aber daß ma was geasse het, wisst i itta.
Ond rumgschnäklet, Süßigkeita ?
Wenn mir vo de Mama was kriegt hand, des woiß i no gut, an Ostre, do hots doch so bunte Eier geabe die kleine, die hammer alle gsammlet, daß mer an Ostre was geht hand. So war eisre Jugend. Die hammer gsammlet, damit mer was ghet hand, an Ostre. Die hammer it glei geasse. So wars bei eis, so sind mir groß wore, gell. I woiß it amol, ob i a Schultäsche ghet ha, i glaub au it, halt an alte Schulranze ha i ghet, mit ar Tafel. Des hot ma immer wieder wegwische kenne.
So Griffel, wie des ghoiße hot, gell ?
Ja, des war a Griffel. Später hot ma noch scho Hefter kriegt ond Füllar, woißch. Oder die Federhaltar do, wie hot des ghoiße, Federhaltar glaub, wo eidunke hosch miesse in a Tintefaß.
In Kunst hand mir des no gleanet, do hammer mit so am Federhaltar schreibe müsse.
Hosch du die altdeutsche Schrift au no gleanet ?
Na, i ha scho die lateinische Schrift gleanet.
I ka se no. Die find i gut, find i die, i denk oft, ma sott mol me so schreibe, dann woiß koinar, was des hoißt. Du, i woiß au numma alle Buchstabe, aber manche woiß i scho no, grad d Großbuchstabe numma all. Wenn ma denkt, wieviel Johr do scho vergange sind.
Ja, wie isch des mit deine Eltre gweah, hand die Zeit ghet für ui, als Kind ?
It so viel.
Ja, hot ma do mol mitnand gspielt oder so ?
Wüsst i eigentlich weniger, eisre Mama hot ja gar koi Zeit it gheht. Die kleinre Kind, mir hand ja auf die kleinre Kind noch meh aufpasse müsse, ond wenn mir in Stall gange sind, do bisch halt im Laufstall gweah. Do hot ma it lang rumdau.
Ja, ja, klar. Aber daß se mit ui gspielt hand ?
Ja wenn denn, wenn denn ? Mei, wenn die z Obend nochar ins Bett gange sind, sind se au recht miad gweah.
Ja, wenn sind dir ins Bett gange ?
Mei, des woiß i it, i bi ja dann au scho im Bett gweah. Mir hand scho um Achte gau müsse.
Und sonst, was hättet die Eltre mache könne ? Wenn ebbar krank war, do isch ar scho pflegt wore ?
Ja klar, do isch d Mama scho do gweah. D Mama isch meh do gweah, wie de Papa.
Mei, der war halt me Ausserhalb omandand oder ?
Ja, dr Großvater hot no viel auf d Kind aufpasst, wo der au no do war, gell. D Großmutter isch no meh in dr Kuche gweah, wo d Mama im Stall war, so hot ma do zammgholfe.
Ja, des isch ja sche, wenn ma do zamm helfe ka. Dr Großvater, hot der dann Gschichta verzellt ?
Dr Großvater ? Weniger, i sag ja, der isch no krank wore, woisch, do hot der Doktor domols au it gwisst, was ar hot, domols isch halt die Zeit so gweha, woischt. Des isch der Erst gweah, wo noch gstorbe isch.
Ja, do hot ma oft it so viel mache kenne.
Noi, oder hand se s au gar it kennt.
Manche Krankheite, ja klar, do hot ma s it so gnau gwisst. Do hots ja koine so moderne Medizin geabe.
Noi, do isch eigentlich blos dr Doktor immer zu eis nauf komme, des weiß i no.
Welar Doktor war des ?
De Dr. Jung, woisch doch.
Jung, so, ja. Dr Kimratshofar Doktor.
Dean hosch bestimmt no kennt, oder ?
Ja, de Name sait mer no was.
Der war gut, der Doktor, mir hand n gean mege. Du, der isch ibrall nakomme, im Winter isch der mit de Schi komme, also, der isch bei jedar Geburt derbei gweah, mei des war scho a gutar Doktor.
Wo sind denn die Kind auf d Welt komme ? Drhoim ?
Drhoim.
Deine Gschwister au ? Hosch du des dann mitkriegt ?
Beim Letschte. Ja, woisch, mir hand it neideafe, des isch ja klar, gell. Hots schnell ghet, eigentlich.
Dr Vater, isch der dinn gweah ?
Noi, der Vater war do it derbei. Mei Ma war ja au it derbei, oder. Domols war des no it so.
Ja, dann war praktisch d Mutter, dinn, dr Jung, dr Doktor halt ond d Hebamm ?
Ja, d Hebamm, die war au do.
Wer war d Hebamm do ?
Die war vo Spöck, aber i woiß numma, wie se hoißt, oder ghoiße hot.
Ja, ond was hot ma denn noch Feierobend so gmacht ? Hot s do an reachte Feierobend überhaupt geabe ?
Wenn dr Feierobend war ? Ja erstens hot ma koin Fernseh ghet ond dann waret mir au scho meh so groß, mir waret dann numma so Drhoim neighocket, mir sind dann no scho wieder meh a bitzle futgange.
A wa ?
A wa, saisch du ? Mir hand im Winter - i war ja dann blos im Sommer Drhoi, woisch - und im Winter war i ja in Stellung, woisch, do bi i Schaffe gweah. Do war i ja im Kleine Walsertal dinna, nochar.
Was hosch do gmacht ?
In ar Pension war i do, Zimmre gmacht, Zimmermädle ond Obends isch a Mädle vo Mainz do gweah, die hot noch d Küche ghet ond dere ha i nochar no gholfe, aufräume ond alles.
Ond do warsch de ganze Winter weg. Von wann bis wann ?
Des war so vom November, Dezember bis Februar, März, halt so die Wintersaison, do war it it Drhoi.
Wie alt bisch do gweah ?
Hm, wie soll i sage, 17, 18.
So was. Aber als Kind vorher warsch Drhoi ? Sind do blos d Mädla im Winter futgange oder d Bube au ?
Na, d Bube hand ja ihren Beruf ghet, woisch.
Ach so, ond du warsch praktisch, solang du no Drhoi warsch auf m Hof, hosch do gschaffet ond hosch im Winter dann auswärts schaffe müsse. Weil du praktisch suscht koin Beruf ghet hosch, oder wie ?
Ja, Lohn ha i sowieso koin ghet. Aber d Mama isch alloi fertig wore, woisch. Die hot im Winter ja Duss koi Arbat it ghet, no isch se Hinn fertig wore. Mit de Großeltre praktisch, no ha i ja gau kenne, mei Schwester war nochert ja au fut.
Im Sommer wärs gar it gange, weils vo der Arbat her zviel wär.
Ja, do hammer zfrieh allat meh Hoi miesse, Sch....
Wars do scho schie im Walsertal ?
Du ja, do hots mer gut gfalle, i ha do zwoi nette Stella ghet.
Zwoi nette ? Ja, do hot ma viel Leit troffe..
Mei, do waret lauter Fremde do.
Mei, Geld verdient ?
Ja, do hot ma gsparet, daß ma was ghet hot, wenn ma Hoi komme isch, ja so wars. Easse hammer ghet, ond s Schlofe au ond s Geld, was hammer kriegt ? 200 Mark im Monat. Wenn do denksch, was se heit krieget.
Ja, gut, aber die 200 Mark waret detmols scho no meh wert, viel meh wert. Vielleicht wei huitsedag so 700 Mark.
Ja, schaffe hot ma scho meh müsse. I ha am Morge um Fünfe aufstau müsse ond Z Obend um Zehne bin i no in dr Kuche stande.
Do hot s fascht koi Freizeit geabe ?
Na, i ha fascht koi Mittagszeit ghet, i ha immer a Arbat ghet.
Ja, ond an freie Tag amol ?
Na, do hot ma koi khet. Wenn die Leut do sind, do musch halt schaffe, do hosch du it faul wona hocke kenne. Die hand z Obend ja no warm Easse kriegt no in der Pension. no woisch scho.
Ja, aber daß ma halt mol an am Mittwoch frei hot oder so ? Oder an Namittag frei ?
Na! I ha immer Arbat ghet, Kellar aufrumme..
Ja, du hättsch doch mol Schifahre kenne, im Walsertal.
Na, do hammer koi Zeit it ghet. Wenn hättet mir des solle ? Mir hand schaffe miesse.
Ja, wie war des dann am Sonntag Droi aufm Hof ? Do hot ma dann aber amol weniger dau, oder ?
Ja, im Sommer itta, ond im Winter bin i ja it do gweah. Im Sommer hot ma au ghaiet, wenns sche Wetter war.
Do hot ma also so viel Zeit zum Haie braucht, daß ma it freinehme kenne hot ?
Wenn du a Hai duss ghet hosch, dann hosch du des am Sonntag au reidau. Moistens hot ma s so nagrichtet, daß ma am Sonntag blos eiführe hot kenne, daß ma it mähe hot müsse, wengistens.
Do hot s also au kaum Freizeit geabe, daß mol gsait hetsch, i ha nix zum do, ka a Wink rumhocke.
Noi, i ha halt Freizeit ghet, weil i no fut bin. Zum Tanze simmer gange.
Z Kimratshofe oder ?
A, wa, was wills Kimratshofe oder s Walzlings denn afange, do hots doch nix geabe.
Dann z Altusried ?
Na, z Altusried war i no nie, doch, beim Daiser ond beim Natterer, wo die no do waret. Beim Daiser, do wars nett, do dinn, beim Natter wars ganz schö gmietlich. Noch Wange naus simmer gange, mir sind übrall rumkomme, noch Legau, dr Löwe frieher, der war was.
Ja, daß des kräftemäßig denn gange isch: de ganze Tag schaffe ond z Obend dann no futgau ?
Mir waret jung, heit dät i s numma aushalte, domols isch des scho gange, des hot ma det braucht, gell. Mir sind halt viel zum Tanze gange, des hand mir gean dau. Woisch, ond dann hosch ja domols luege müsse, daß mit jemand futkusch, hand ja it alle a Auto ghet.
Hand deine Brüder a Auto ghet ?
Ja, die hand a Motorrad ghet, an Adler ond später hand se a Auto ghet. D ander hot an DKW ghet, hots des geah, gell scho ? Oinar mit ar harte Schaltung, ond de Tone hot an VW ghet, glaub.
Ond mit deane hand ihr mitfahre deafe ?
Mit deane sind mit it mitgfahre, na, na, na, die hammer it braucht, die sind scho extra gfahre, die Bube.
Hot do dann irgendwie Streitereia geabe, a Gegnerschaft, so Bube gege Mädla oder so ?
Na, mei, Drhoi gstritte hot ma immer mol, des isch klar.
Z Obend, noch m Obendeasse, do hot ma nix meh gmacht, do isch ma glei ins Bett gange ?
Mei, die sind oifach größer gweah ond mir sind noch meh für uns gweah ond die Kleine, mei, die hot ma ins Bett dau. Vielleicht hand Mama ond Papa no gfernsehet, wenn ma an Fernseh ghet hot, no wearet se au bald ins Bett gange sei. Mei,it so wie heit.
Mei Frog war halt, was hot ma am Wochenende so gmacht, aber dir hand ja eigentlich gar koi reachts Wochenende ghet ?
Mei, s Bad isch in Altusried gweah, was will d Mama, mit de Kinder, der ganz Bande denn do ? Do hot d Mama gar koi Zeit it ghet.
Am Samstag hand ihr no Schul ghet oder ?
Na, des woiß i iazt it, ob mir am Samstag no Schul ghet hand oder it, des ka i dir iatz numma sage. Am Samstag ond Sonntag waret no d Brüder do, do hot ma dann sowieso meh reidau wie sonst, do hand ja die mithelfe könne. Nix zum Strawanze, ausser z Nacht dann.
Halt ab dem Alter vo 17 bis 19 oder ?
Ja, suscht simmer Drhoi gweah, do simmer dumm gweah.
So dumm war des it.
Ja, des war gar it schleacht, gegs heit.
Beruflicher Werdegang: wie isch des mit m Beruf gweah, du hosch gsait, du bisch zescht mol in d Schul gange, hosch Drhoi gholfe ond ab der 8. Klasse hosch dann die hauswirtschaftliche Schule in Altusried gmacht, im Haus der Bäuerin, die 9., 10., 11. Klasse, drei Johr waret des, do bisch dann mit 18 fetig gweah ond warsch dann praktisch a gelernte Hauswirtschafterin.
Do bin i praktisch im Sommer Drhoi gweah ond im Winter beim Schaffe.
Ja, im Winter im Walsertal, in Stellung
Bis i gheiret ha.
Wenn hosch denn do gheiret ?
1968, na 1967, 68 isch ja d Fehl komme.
Do warsch dann praktisch 23 ond hosch bis dohin 5-6 Johr im Walsertal gschaffet. Ond nochm Heire hosch dann beruflich nix meh gmacht ?
Nix meh, mei Beruf war Drhoi, Kinderaufzieh wieder.
Also Hausfrau.
Ja, halt an Neabejob han i no ghet.
Gell, du hosch gsait, 200 Mark im Monat hot ma kriegt. Was hot ma mit dem ersparte Geld dann gmacht ?
Von deam ha i Klamotta kauft ond Bettwäsch kauft, so was.
Wie ma domols so a Aussteuer ghet hot. Mei Mutter hot au im Kaschte dinna so an Zuig ghet, wo ma nie nimmt, es aber halt rumflacket, gell.
Des isch so weiße Wäsch gweah, ond des ma ma gar numma so. Do ha i koine meh, des isch scho lang her.
D Mama hot do au no zwie Keza im Kaschte ghet. I woiß au it.
Woisch, frieher hot ma doch so Dings ghet, wie soll i sage, wenn de stirbsch, des hand mir alle kriegt ghet, glaube, des isch, wenn du stirbsch, sind Kerze drbei ond ebbs wo s Weihwasser neikommt und des isch des wahrscheinlich gweah, wo du moinsch. Do hot ma des khet, daß ma des glei khet hot, wenn dr Pfarrar kut.
Ond des hot ma glei in der Jugend kriegt, so als Grundausstattung ?
Ja. Des hand moischtens blos d Mädla kriegt, d Bube brauchet doch des it. Des hand d Weiber mitbrocht.
Nebenbeschäftigungen wirds so kaum geabe hau, dir hand ja so gnue Arbat ghet oder ?
Doch, wenn i Drhoi war, ha i no Strom abglease. Also it Drhoi, noch wo i scho verheiret war.
Wie war des dann: beim Tanze hosch du dann de Ehepartner kennegleanet, weil do isch ma ja unter d Leit komme ?
Ja.
Was hot sich iatz denns o im Vergleich zu deiner Kindheit zu Huizetag verändret ?
Mei, Spielsacha hammer it viel ghet. Mir sind viel Duss gweah.Im Wald hand mir viel gspielt.
Was hand ihr do gspielt ?
Was moinsch, was mir do gspielt hand, do wiesch du lache. Erstens hand mir Wageräder gnomme, die hand mir de Buckel na glau, ond dann, was hammer no dau, dann simmer Schi gfahre, an Baum na gfahre, ja ond dann hammer no aus de Tannezapfe Pfeifa gmacht.
Hoi, so Pfeifa zum Rauche ?
Ja, zum Rauche halt, halt zum do als ob. Do hosch an Tannezapfe gnumme, hosch n oba ausghölt, noch hot ma a Moos neidau, des war dann de Tabak, ond dann hosch du an Steacke neigsteckt an dr Seite ond des war dann dei Pfeife, dann hammer graucht. So als Opa, woisch, des war unser Spielzeug. Ond dann hammer drei Scheitla ums Haus dau, ond Bockjucke, kennsch des numma ? Solche Sacha hand mir gmacht. Ond wie hoißt des, wo mer no in dr Schul gmacht hand: Völkerball. Ond an Barre hammer ghet, wo mir turnet hand. Ond Drhoi hammer hinda so a Stang ghet, do hand mir turnet.
Hand dir ui dann unter der Woche au mol gegenseitig bsucht, so dir Schulkamerade ?
Unter der Woche eigentlich wenig, des isch höchstens an dr Maiandacht gweah. An dr Maiandacht hammer eis troffe ond dann simmer zwischenei ins Gschaidt gloffe mitnand, so a Clique. Des war eigentlich mehr in dr Maiandacht, weil nochar hosch du dann koi Zeit meh ghet. In Walzlings hammer no a Wiatschaft ghet, aber die kennsch du numma. Mir sind aber eher noch dr Maiandacht ins Gschnaidt gloffe, ja dur de Wald bei eis, do bisch glei dinet.
Aber anand bsuche hand ihr dann it so kennte.
Noi, do hot ja jedar schaffe miesse, do hot ma it zum andre springe kenne, do hättesch Gosche kriegt.
Hand ihr dann amol an Ausflug gmacht, daß Vater ond Mutter mol gsait hand, ma feht an de Bodesee oder so was ?
Ja, wie wänd se nafahre, ohne Auto ? Domols hots no koi Auto geah, nix war los, drum ha i dir ja gsait, daß mir auf Altusried radle kenne hand.
Wie bisch dann ins Walsertal zum Schaffe komme ?
Do hot der Chef mi gholet.
Ond suscht, auf Kempte nei, isch ma do mol nakomme ?
Du, do war i mit dr Mama oimol dinna, do isch a Markt gweah, aber was für oinar, ka i numma sage. Ond so simmer bätschnass hoikomme, des war alles, des war eiser Ausflug. Des vergiss i nie meh, do hots afange reange, mir waret bätschnass ond i war frisch gimpft.
Aber suscht hettsch du Kempte gar nie gseah. Du hosch halt gwisst, daß des do dienet isch, aber meh au it. So wie ma huitzedat vo Australien schwätzt oder so.
Ja, so war des halt domols, wenn ma koi Auto hot, do kut ma niena na.
Hand dir Bücher drhoi ghet, zum lease ?
I woiß halt vo dr Zeitung, große Bücher woiß i gar it, halt so Schulbücher dann später, des hammer ghet, suscht wießt i eigentlich nix. Ka sei, daß mir mol so Kinderbücher ghet hand, aber i wisst vo gar nix.
Hot am ebbs mit Musik gmacht, hot jemand a Instrument gspielt ?
Do hot niemand was gmacht, mir hand halt a Zieharmonika drhoi ghet, do hammer druf rumplemperet.
Isch die vom Großvater gweah ?
Du, des woiß i numma, die isch halt irgendwie do gweah. Mei, was hosch do do welle als Kind, du hosch halt schaffe miesse, i hätt au könne was anders do. I hätt au meine Beruf ghet, wo i gean gmacht hätt.
Was hättsch do für oi khet ?
I hätt drei Beruf ghett: I hätt Friseur gean welle, oder Floristin oder Näherin.
Des hosch aber it deafe ?
Ja, du musch Drhoi schaffe. Woisch, d Näherin, zu eis isch allat a Hausnähere komme, die isch zu de Baure ins Haus komme, die hot Hämeder gnäht, hot bei eis Schürza gnäht, frieher hot ma ja no Schürza naneah müsse, vor allem d Kinder. Ond dann ha i dere viel gholfe, des hot mir halt gfalle, irgendwie. Die isch über Nacht bliebe, a paar Däg, bis se des gmacht khet hot, dann isch se wieder Hoi gange. Die isch praktisch auf d Stehr gange, hot ma frieher gsait. Heit geits des numma. Ja, die isch do immer komme, ond hot für de Papa Hämeder gnäht, eisre Kleider ond Schürza, wo ma halt so braucht hot, oft hot ma was vertrennt, woisch, hot ma was Frisches gmacht, mei ma hot ja koi Geld ghet. Mir waret it so anzoge, wie die Heitige.Mir sind in d Schul komme, bätschnass, no hammer zescht amole d Schu an de Ofe stellt. So war des domols.
Isch die Näherin denn öfters komme ?
Wenn ma se halt braucht hot, vielleicht im Frühling ond im Herbst amole.
Des war sicher interessant für ui, wenn die komme isch, do isch was los gweah.
Ja, weil mer die g ärgret hand. Mol hammer undanei Nodla steckt, no isch se druffghockt, do isch se eis nochegange, mei Liebar, do hammer die groß scher gspürt. So an Bledsinn hot ma gmacht.
Wo isch denn die herkomme ?
Die isch vo Oberhofe, vo Kimratshofe komme. Die isch mit m Fahrrad komme.
Ja, klar, mit m Fahrrad hot ma detmols alls gmacht. Sind nochher no andre Leut auf Stöhr komme ?
Na.
Also a Schuster isch koinar komme ?
Na, i ha müsse d Schuh auf Bachtels nauftrage. Ja, do isch a Schumachar gweah. Wenn de Berg naufluegesch, bei dr Wiatschaft schräg numm, do isch oba a kleis Häusle. Wie des heut aussieht, woiß i itta, ond des isch de Schuhmachar gweah. War ganz schö weit. Wenn do alloi nauflaufe müsse hosch, do war des it so interessant. D schu naufdo ond nochher hole. Do hots blos ghoiße: iatz gosch iatz do nauf, dusch die Schuh do nauf ond kusch wieder. Do hot ma it lang rumdau. Heitzedag tut ma ewig rum, woisch du des.
Ja, do hand die Eltre koi Zeit khet, zum lang rumdiskutiere.
Noi, die hand it lang rumdau, du hosch aber au gfolget. Du, do hosch it drgegeschwätze deafe, no hosch vom Vater oine kriegt. Do hot ma it lang rumdau. Aber heit deaf ma ja d Kind numma haue.
Sind au suscht no Hausrierar vorbeikomme ?
Do isch halt die oi komme mit deam Sirup, die hot des halt ausgfahre. Ond mit dr Bettwäsch isch oine komme.
Sind Zigeunar komme oder Futtermittelhändlar ?
Noi, wenn ma Futtermittel braucht hot, die hot ma beim Hösle dond gholet. Oder der hots naufbrocht, sogar. Isch a nettar Ma gweah, aber die Bube vo deam kennsch doch. Der Vater isch ja tödlich verunglückt, war ganz a nettar Ma.
Hand ihr dann Schicksalsschläge aufm Hof ghet ?
Na, eigentlich it. Dr Großvater isch halt gstorbe, dann nochher d Großmutter, so isch des halt noranand passiert. Aber suscht hammer scho Glück ghet.
Was hand ihr denn für Viecher aufm Hof geht ausser Henna und Kieh ?
Saua hammer ghet, ond d Großmutter hot allat no Schäf ghet. I woiß numma, was mer mit deane gmacht hand, auf alle Fäll hammer des Fell nochar ghet, die Schäf hammar aber numma lang ghet. An Hund hammer au ghet, Katza, Gänse hammer ghet. Die hot d Mama an Weihnachte verkauft, die hot ihre Leit ghet, wo se die nochar verkauft hot.
Was waret denn so bsondre Feschtdäg so im Johr ? Weihnächte oder ?
Ja, ond friehner hot ma halt Namesdag gfeiret, Geburtstag.
Wenn dr Vater Namesdag geht hot, sind do dann Gäste komme ?
Ja, halt d Nachbaure.
Verwandschaft au ?
Hm, Verwandtschaft eigentlich weniger. D Schwester vo der Mama, die war in Thalkirchdorf, do war ja blos oi Schwester do. So eigentlich meh d Nachbaure. Ma hot ja eigentlich gar it so viel Verwandtschaft ghet, ond die sind weiter weg gweah. Dr Großvater hot blos zwei Töchtra ghet, blos d Mama ond a Schwester ond die war ja in Thalkirchdorf, in der große Wirtschaft. Do war i au mol beim Schaffe, so mit 13 dob, a Wuche. Ja, überall hot ma di nagschteckt. Die waret froh, daß se mi ghet hand ond d Mama Drhoi isch froh gweah, daß me ebbar vom Tisch weg war.
Also, d Namesdäg hot ma gfeiret, war Kirbe au was zum feire ?
Ja, ja, Kirbe, do hots immer a Gaus geah, des woiß i no, ond s Martinsfest, so hoißt die Kapelle in Walzlings, des war au so a Sonntag, do hot ma dann it gschaffet. Ja, ond beim Hopfebrocke simmer gweah.
Wenn hosch denn des gmacht ?
Des war allat nett, des war so mit 15,16.Des war do im September, do isch s Moischte Drhoi scho dau gweah, des war do dond in Tettnang. Des war nett! Also, mir hand an gute Baure verwischt, so muss ma sage. Andre hand gjammret mit m Easse ond alles. Ond der Baur hot mi dann no lang bsucht. No hot ma do d Hopfesau ghet, do isch ma mitm Traktor ond am Ahängar gfahre ond hot d Hopfesau gfeiret. Hopfesau isch des, wie soll i des iatz sage, hm, des ka i gar it beschreibe. Des war a Abschlussfest, do simmer dann alle auf deam Anhängar dobghocket, do hot a Musik gspielt ond do isch ma a Runde gfahre ond hot ma gfeiret. Des war nett. Woisch, do sind Männer Obends komme, die hammer dann gehrig brocke lau, no hand se meh gau kenne (lacht recht), mir hand se it brauche kenne, mir hand ja bei deane Leit gschlofe. Des isch nett gweah. Des isch heit numma interessant, meine Bube ware au amole, aber des hot ma do alls mit de Maschina gmacht. Des isch iatz numma so interessant. Det isch ma no sche do Duss ghocket, hot de Krätte neabedet ghet, hot gschaffet. Mir hand des no ghet, was die Jugend heit alls numma hot, so mitm Hopfezupfe, mit Gemeinschaft irgendwie, des isch au numma so, gell.
Ja, so richtig lustig, daß ma lachet ond tanzt, des geits numma so viel.
Ja, wer tanzt denn heit no vo de Junge ? Die schüttet sich blos no in de Grind. Ond die laut Musik. I wills gmietlich hau, i will no schwätze kenne, mir sind gean tanze gange, des war allat schie. Die Junge heit hand halt au an Haufe Freizeit, für ui war des halt no was viel Bsondereres.
Ja, des isch aber au so: im Privathaushalt hand d Kind ja bald koi Arbat meh. No gand se fut ond machet dann blos Blödsinn. Ond mir hand halt schaffe müsse. Ond des isch heit eigentlich scho de Fehlar.
Wie war des mit der Kommunion bei dir ?
Do isch d Großmutter mit eis in Kiche glofe, ond nocher simmer zur Nähere gange, zum Easse, do hot d Mama a Easse mit runterbrocht ghet, no hammer do geasse ond dann simmer wieder in d Kieche gange, weil am Zwoi nomol a Andacht war ond dann simmer wieder hoigloffe. Des war meine Kommunion.
Ond d Eltre, waret die gar it derbei ?
Noi, die hand koi Zeit it ghet, woisch, die hand ja scho wieder kleinere Kind ghet.
Ja, und suscht, vo andre die Eltre, waret die derbei ?
Niemand war derbei, bei mir halt no Großmutter. Do hammer so a Bildle kriegt, ond des war mei Kommuniongschenk.
I ha au so Bildla kriegt, aber dann au an Haufe Pralineschachtla.
Des hots bei eis it gea. Du, mir waret aber au zfriede, i woiß es itta, mir waret au zfriede, mir hand nix anders kennt.
Wie war des dann bei der Firmung ?
Bei der Firmung ? Des woiß i numma, a Firmpatin ha i ghet, des war mei Schwester. Aber ob ma do au zum Easse gange isch, des woiß i numma.
Hosch do a Gschenkt kriegt ?
Do ha i glaub Ohrering kriegt. Do ha i mi gfreit, des waret meine erste Ohrering. Ja, i muss sage, mir hand eigentlich au a nette Jugend ghet, so gseah, mir hand it viel ghet, hand aber trotzdeam a nette Jugend ghet, wenn so zruckdenksch.
Ja, dir hand no a Freid ghet. Wenn ma hutsedag die Junge so rumhänge sieht, die hand koi Arbat, hand alles an Technik ond Zuig, aber sche hands die au it. Oder d Eltre, obwohl se an Haufe Zeit hättet, kümmret sich trotzdeam it um d Kind. Domols hand deine Eltre ja gar koi Zeit ghet.
Ja, klar, oder se hand au koi Zeit, weil alls Schaffe goht.
Ja, do isch alls fut. Frieher isch ma halt allat ums Haus rum gweah, do hot ma anand ghet.
Do hand d Kind no mitnand selber spielt. Ond des find i am schlimmste, wenn die Junge koi Arbat hand.